المستوي التاني : حالة حرجة

حالة حرجة
مش عارفة  ابدأ منين .. او اصلا مش عارفة انا رجعت اكتب ليه و كمان ليه اخترت الاسم دا بدل حالة ربكة مع ان الاتنين قريبين من بعض .. حالة ربكة كانت فرق بين حالتين في وقت واحد زي ما تكون بتضحك و زعلان .. زي ما تكون بتموت من جواك و عامل نفسك قوي  و محدش يقدر يكسرك ..
انما حالة حرجة ممكن نعتبرها .. ممم .. نتيجة ! ..اه نتيجة تمشي اكتر .. نتيجة مترتبة ع الحالة الاولي ..
زي ما تكون حالة ربكة كانت مرحلة بتوصل لحالة تانية "اخطر" منها شوية
الاول انا كنت فاهمة الحالة انما دلوقتي .
ولا انا فهماااها ولا حتي عارفه غير انها بقت حالة حرجة ..
ع المدي القريب انا مش بحاول ابين لنفسي حلول ولا اسباب ،زي ما اكون حبيت افضفض قبل ما انفجر ، انفجر ايه لا انا عديت دي كمان .. قبل ما تبقا فعلا اسم علي مسمي
اتكلمت كتير عن الاكتئاب في حالة ربكة اتكلمت عن ناس كتير سلبية و قصص من وحي خيالي بس يمكن مشتابهة بالواقع اللي حواليا .
حاولت الاقي علاج في كل موضوع بكتبه
او حل مؤقت او حل علي المدي البعيد
المرة دي انا فعلا مش عارفة اي حاجة غير اني بحاول انقذ ما يمكن انقاذه .
دا لو لسه متبقي حاجة تديني امل فعلا من غير ذرة شك واحدة انها مش امل ..
كل اللي حاولت انقذه في الفترة اللي فاتت انا بوظته اكتر
سواء حياتي .. دراستي .. عاطفتي !! ..
حاولت انقذ ضحكتي .. اللي باقي منها علي الارجح ..
بحس اني مجنونة احيانا و بتفير في ثانية من حالة للتانية ..
يعني اكون عادية و فجأة ينزل الالهام عليا ان في حاجة غلط في حاجة ناقصة .. اه افتكرتها .. الاكتئاب !
بتحول بسرعة لكائن مريض ملازم للسرير حاضن نفسه و سايب المجال لدموعه و قهرته تطلع من جواه لحد ما يروح في النوم .
بمناسبة النوم انا مش عارفه ايه حكايتو معايا
بقت كل حاجة اهرب منها بالنوم حتي التفكير بهرب منه بالنوم النوم بقا زي المغناطيس .. حتي انا مش بجبر نفسي عليه لاء .. هو بيشدني و بيسحبني لمكان بعيييييد .عيني تغمض و تبدأ الضلمة .. محاولة سيئة جدا يا نفسي انك تخليني انام غصب عني مم بتهربي ليه .. الخوف من المواجهة دا مش عديناه قبل كدا .. ولا دا خوف من النتايج اللي بعد المواجهة ..مش عارفة
المشاكل اللي بتزيد دي هل انا السبب فيها .. سمعت كتير الكلمة دي مش عارفة هل هي بجد ولا الناس بترمي عليا عشان ميصدقوش انهم جزء من المشكلة .
وحش اوي انك تضطر تعيش مع حد بيتهمك انك سبب كل حاجة وحشة .. وحش اوي انك تحاول تصلح نفسك و متعرفش
ولا المشاكل اللي اصلا جاية غصب عننا و فوق طاقتنا
ولا المشاكل بقا اللي هي بسببي فعلا بسبب الحالة دي
مش عارفه اصدق انهي جزء فيا !! الجزء اللي بيقول انا السبب ولا اللي بيقول انا تعبت و كفاية ولا الجزء اللي خلاص نام ولا الجزء اللي بيعافر .
اختار ايه .. و ازاي اختار اصلا ..
اختار اعيش عادية ميتة كدا و زي العبيد افعل ما أأمر به
ولا اختار اعيش متمردة ع الدنيا و احاول اكون حالة افضل
بس هنضحك علي مين كل الطرق أدت الي .. الاكتئاب
ضعيفة انا جدا عشان اقدر امسك نفسي للأخر
ضعيفة و هشة جددااااااا .. اني استحمل كل دا
ساعات بفكر في امي و اقول هحاول ابقا زيها قوية .. هستحمل هي استحملت اكتر من كدا و اهي لسه فيها امل
و ساعات احس ان الفرق بيني و بينها الخوف ..
اه انا حالة فعلا كفاية ان جوايا اطناااااان كلام متناقض نفسي اكتبه و اشوف نفسي بعيني ..
تعبت .. هكمل بعدين يا سارة
بس متنسينيش ارجعي اكتبي لي تاني عشان تتطلعي اللي جواكي .. ماشي متستسلميش للحالة .. اكتبي
لو حد بيقرا الكلام دا انا مش بكتبه للقراية
انا بكتبه عشام اطلع كل اللي جوايا و خانقني فيا
مش لازم كل مرة اشكي من حاجة او حد
المرة دي انا المحتوي .. وانا الاخراج